नब्बेपछि सय श्रीमती बनाउने रहर

21/06/2011 13:24

बुढापाकाले भन्थे-मर्दको बाहृ श्रीमती । अहिलेको जवानामा यो पनि धेरै थोरै भैसकेको छ । नाइजेरियाका बेलो मसाबा नामका एक पुरुषले यसअघि नै नब्बे श्रीमती भित्राइ सकेका छन् । खै के पुगेन, उनी सन्तुष्ट भने छैनन् । अझै दश श्रीमतीलाई घर भित्राउने धोको रहेको उनले बताएका छन् । क्रिकेटको भाषामा भन्ने हो भने उनलाई सय वटी श्रीमती ल्याई सतक बनाउने भूत लागेको छ ।

आफूले अल्लाह (भगवान) को निर्देशनमा यति धेरै श्रीमतीसाग बिहे गरेको ८७ वषिर्य मसाबाले बताए । उनको यो योजनामा नाइजेरियाको कानूनले पनि साथ दिएको देखिन्छ । बहु-विवाहमा प्रतिवन्ध एवं यति नै श्रीमती ल्याउन पाउने भनी नाइजेरियाको संविधानमा कुनै उल्लेख गरिएको छैन । केहि श्रीमतीले मर्द हुनको लागि कैयौं बिहे गरी अल्लाहबाट पुरस्कार हुनु पर्ने बताएपछि त मसाबा झन हौसिएका छन् । मन तन्नेरी भएपछि तन कहाँ बुढो हुदो रहेछ र !

पहिले युवती/महिलाहरुसँग कुरा गर्न तथा नजिक जान निकै डर लाग्ने मसाबाले बीबीसी संवाददातासँगको कुराकानीमा खुलासा गरे । त्यसैले सुरुमा दुई श्रीमतीभन्दा बढी ल्याउन नसक्ने आभास हुने गरेको उनले आफ्नो भित्री मनोभावना खोले । अब त उनी निकै खप्पिस भैसकेका छन् । ‘म महिलाको पछि लाग्दिन । उनीहरु आफै मसामू आउछन्,’ मसाबाले भने, ‘अनि अल्लाहले बताएबमोजिम म उनीहरुलाई श्रीमती बनाउछु ।’

मनले खाने श्रीमती को ? भन्ने प्रश्नको जवाफमा श्रीमती नम्बर ३, ४ र २४ ले आफ्नो खुब प्रसंसा गर्ने भएकोले उनीहरुको सबैभन्दा बढी मनपर्ने उनले बताए । अचम्मको कुरा के छ भने अधिकांश श्रीमतीहरु एकअर्कासँग कुनै रिस राग नरहेको बताउछन् । हालसम्म ११ श्रीमतीले मात्र सम्बन्ध तोडेका छन् । जवरजस्ती गरिएको कुरा अल्लाहलाई मन नपर्ने भएकोले सायद आफनो २ सय बच्चाबच्चीहरुमध्ये ५५ को मृत्यु भएको हुनसक्ने उनको विश्वास छ ।

Source:Onlinekhabar